sábado, 12 de octubre de 2013

Al rodiu la Física Fáustica


 
Les palabres de Spengler fueron mal interpretaes, con farta frecuencia, nun sentíu relativista. Acordies col relativismu, nun habría una “ciencia universal” válida pa toles cultures y civilizaciones, caúna d'elles va tener la so verdá. Contra'l relativismu, y a favor del universalismu, podría alegase que los cohetes espaciales chinos llanzáronse en base a cálculos y teoríes de la Física pertenecientes a un mesmu corpus epistémico, non distintu del européu, americanu o rusu. Igualmente, los científicos nucleares iraninos comparten la mesma ciencia, y puen llevar dicha ciencia a les mesmes realizaciones práctiques que los de cualesquier otru ámbitu cultural de la humanidá. Pero esti pretendíu universalismu de la ciencia contemporánea abasna un llastre habitual nos nuesos díes de “globalización”. El llastre denómase “presentismu”. Vívese como si nun esistiera la Hestoria, como si se borrara de forma completa'l procesu de desenvolvimientu de caúna de les cultures y civilizaciones hasta llegar al caóticu fornu y a la ferviente pota que ye'l mundu güei. La ciencia físico-química, precisamente no que fai a les sos aplicaciones práctiques, a les sos estensiones tecnolóxiques, ye de facto una conocencia y recetariu universal que, remanada dientro de civilizaciones diverses, yá ta a llibre disposición de tolos homes. Velaquí que yá na Antigüedá y nel Medievu, los ameyoramientos armamentísticos universalizáranse y non precisamente pa traer paz y concordia ente los pueblos. Sustancialmente nun hai diferencies nestos tiempos que cuerren: Occidente, con tol so potencial fáusticu unilateralmente empobináu escontra un capitalismu tecnolóxicu, ta creando les bombes y los aparatos colos que, mañana, otru día, los islámicos o los orientales van poder esclavizalu. Esta ye la llección de Spengler que podemos lleer nel so llibru Años Decisivos.

 

Nuna mirada histórica, non presentista, ha repase qu'hai “una” física apolínea (antigua, griega), “una” física máxica (árabe), “una” física fáustica (europea). Esta evidencia histórica nun guarda relación con una platónica concepción de la verdá, con un realismu de la castra que se quiera. Lo que Spengler quier dicinos ye que les trés ciencies físiques que fueron posibles son mutuamente incomprensibles, caúna va ver a la otra como un simple depósitu de vaguedaes y nociones anubríes. Como asocede cola moral y col arte, hai tantes “físiques” como cultures y civilizaciones sían posibles, pos cola ciencia asocede lo mesmo que con cualesquier otra creación de l'alma del home: ésta realízase y esprésase a partir del suelu onde enraigona y a partir de los carreros que'l destín trazó pa esa cultura. Bien ye ciertu qu'atopamonos güei nel trance d'una civilización “universal”, pero esti trance ye asintóticu, y una vegada aportemos a ciertu puntu, la pota puede españar y el procesu pue recular. Nada garantiza (pos el sinu ye inescrutable) qu'esa civilización universal haya de trunfar, nin tampoco lo contrario. Y, precisamente porque los factores más rápido universalizables (armamentu, tecnoloxía deshumanizadora, depredación capitalista) son los más xenocides, siempres somos quien  p´aguardar una protesta aportada dende los elementos más fondos de cada especie cultural d'alma, una verdadera revuelta del raigañu contra la foyarasca inmunda. Esa reacción identitaria, esa “vuelta a los raigaños”, nunca ye del tou descartable. Non na Europa decadente de los nuesos díes, que foi, bien mirada, la esportadora de les sos creaciones, la cégara y fata criadora d'armes mortíferes coles qu'ella mesma se suicida. Non cabe esperar del Islam -o de cualesquier otra civilización rival del occidente européu- un xiru melgueru nel so devenir, una vegada qu'adopten la ciencia tecnolóxica que nació con Galileo y siguió con Newton, Born y Max Planck. Van tomar esto, la tecnoloxía, sí, pero nel montón de les sos basures tamién van arreflundiar les idees de democracia, derechos humanos, tolerancia y respetu a la persona. La mesma tradición filosófica occidental, la irradiación mesma qu´ “el milagru griegu” supunxo pal mundu rebaxárase a la condición de mera “lliteratura” cuando escaez el verdaderu bloque compactu que foi'l Racionalismu una y bones nació en Grecia fai 2.600 años.

 

 

 

No hay comentarios:

Publicar un comentario en la entrada