domingo, 6 de mayo de 2012

Asturies: Nación Faústica d´Europa










Europa nun ye la “Unión Europea”. Creer nesi ente supra y para-estatal ye crer nos mitos del formalismu xurídicu. Namás que llevamos mediu sieglu de medría d´una ficción xurídica adautada a los intereses comerciales d´un garrapiellu de capitalistes. Europa ye una hermandá, dacuando violenta, de Pueblos. Yá Caín fue violentu con Abel, y nun diba ser menos nesta Europa fratricida onde la última guerra mundial o la de Xugoslavia amosaron lo peor de toos nós. Pero culturalmente somos esa hermandá vieya, que funde los sos raigones na comunidá bárbara de pueblos invasores que foron llegando al estremu más Occidental, Iberia, y a les orielles del Mediterráneu. Unos vinieron p´afitar lo apolíneo de la nuestra Cultura (helenos) y otros pa trayer consigo l´alma faústica (celtoxermanos). El Cristianismu, que Spengler alluga cuasimente nes coraes del alma máxica (tardorromana, decadente, orientalizante) va esperimentar una gran mutación. Al rodiu del sieglu X, precisamente cuando los pueblos d´Europa que torgaron l´avance del Islam o que quedaron llonxe, al norte de les amarraces, fueron quieron a reorganizase espiritual y políticamente. El pequeñu reinu d´Asturies, el futuru imperiu carolinxu, depués el Sacru Imperiu Xermánicu, son toes realizaciones d´un alma faústica qu´entama a vivir como surdida d´un llargu sueñu.





Nesi suañu hai espíritu belicista, militar y aventureru. Les Cruzaes, tantu como les equí mal nomaes “Guerres de Reconquista”, son la espresión d´esta alma que se siente incómoda pa con toles torgues y restricciones que se-y pongan. Nun almite la “tolerancia”, la coesistencia. Namás qu´almite campu abiertu ente la so espada y l´infinitu. Mírese como se mire, nun hai otra desplicación de cómo “cuatro asnos selvaxes”, en opinión de les Cróniques mahometanes, pudieron salir de les montañaes d´Asturies y llegar hasta Llisboa, y saqueala, y formar frontera hasta´l Dueru. El cristianismu que de mano tomó forma nes maravíes del arte Asturianu, y yá por influsxu ultrapirenaicu, traxo´l románicu y el góticu, dexó atrás tou resclavu de cultura máxica (la cueva). Lo que se buscaba yera l´espaciu infinitu. Asturies abriose a Castiella, a conquistar nuevamente les llanures, a recobrar Toledo, como los cruzaos xermanos, francos y anglosaxones fueron a por Tierra Santa. A facer rapiña, sí, a robar y matar, pero tamién con fe ardiente, la fe del que va a la gueta d´infinitos.





Ta por escribir lo que d´europeo vieno colos ástures a eses mesetes, a eses estremadures, a eses tierres ocupaes pol Oriente Máxico. Ye güei una zuna de ciertu pensamientu políticamente correchu falar d´una Península Ibérica comu “crisol” de races, relixones, civilizaciones. Lo cierto ye que la tolerancia medieval nun debió pasar de ser un odiu conteníu, nel que la mano nun diba a la espada por pura contención y pragmatismu. Ente les trés cultures, xudaica, cristiana y mora hubo, n´efeutu, puntos de contauto y de convivencia, pero non idílica mecigaya. El puxu militar ástur –heredáu pol castellanu- fue tamién un puxu repoblador. La constante de la hestoria nuestra como asturianos, yá escomenzó equí. El mitu góticu, el de que los cristianos (re)conquistadores veníos del Norte cantábricu yeren godos, tuvo que tar basáu non namás en erudiciones romántiques de la Corte alfonsina, como dellos nos quieren dar a entender. Tuvo que tar fundáu na percepción d´alteridá vista polos habitantes de l´antigua Hispania, los hispanorromanos, dominaos pol Islam.





Como diz Spengler, l´aldeanu ye la más xenuina producción antropolóxica d´una tierra. Solamente los habitantes dexeneraos de la Gran Ciudá, nes Altes Cultures decadentes, dexen de comprender a esta castra d´homes íntimamente venceyaos a so tierra. Ye la industrialización un fenómenu tovía reciente, de 1800 p´acá, que fizo escaecer n´Europa los sos verdaderos raigones. Cuando falamos d´estirpes, llinaxes, raigaños, árboles xenealóxicos, etc., siempre facemos referencia –en realidá- al nuestru pasáu rural. La nobleza europea, dende les cabeces rexies hasta los fidalgos más baxos, son frutu de la tierra y deben tou xacíu a ella. Campesín y nobleza formen un contínuu, son individuos de la mesma castra. N´Asturies y notros países nórdicos, l´aldeanu vien a ser un fidalgu qu´escaeció´l so llinaxe. Y ente´l fidalgu y les más altes capes de la nobleza hai esa continuidá creciente de distinción onde malapenes hai unes barreres p´acolumbrar.





N´Asturies tenemos que posar más la mirada na casa aldeana tradicional. De la bayura de tipoloxíes constructives, aquelles que se correspuenden con una mayor comodidá económica y algamen mayor dimensión, son cases cuasi indintisguibles de lo qu´equí nomamos “palaciu”. Y viceversa, el palaciu o casona rural d´Asturies, polo mneos hasta´l Barrocu tardíu del País (sieglu XVIII bien entráu) ye productu étnicu de la propia cultura del País, indistinguible de les demás edificaciones campesines de la redolada. Nun hai que se dexar engañar pola introducción d´elementos nomaos “cultos” nesta arquitectura palaciega: elementos góticos, clasicistes, barrocos… Dacuando ves nel País la casona asturiana, p. e. la casona bloque del Occidente, un enorme caxón con teyaos de pizarra, la mesma que la de los aldeanos un pocu ricos de por ellí, o bien la casona oriental d´enormes corredores como planchaos ente dos grueses muries cortafuegos que sobresalen na fachada. A munches cases campesines d´Asturies, les más tradicionales y les más dignes, sólo-yos falta amestar un escudu d´armes encima la puerta princiapl pa tener énte los güeyos un “palaciu” nesti sentíu nórdicu nuestru.













Ente los escritores españoles  más o menos averaos al planteamientu spenglerianu, podíemos citar el nome d´Ortega y Gasset. Esti madrilanu, tan argutu cuando trata de bayura de temes, nunca nun pescanció bien l´alma asturiana. Taba a años lluz d´ella. Ye mui de llamentar qu´escribiera elli sobre les casones nórdiques de la península refiriéndose a una hipotética “Cantabria” que nun ye namás que l´actual comunidá con esi nombre, l´antigua provincia de Santander. La Cantabria orteguiana ye Asturies y Euskalherria tamién. Sí qu´hai un aire de familia nes casones de tolos países bañaos pol mar que da nome a esa supuesta rexón inventada pol escritor madrilanu.





A la casona cantábrica, Ortega-y atribúi los rasgos fisiognómicos del ceñu, del xeitu enraxonáu y foscu. Nun podemos coincidir. L´austeridá ye la filosofía del home y la estirpe que gusten de l´autarquía. Dende´l cabezaleru de la casería más modesta hasta´l gran señor del Antiguu Réxime, perceptores de rentes y foros, hai n´Asturies un ciertu sentimientu d´interinidá de la persona en comparanza cola institución que “lleva”. Y ha dicise la pallabra “llevar” más que “poseer”. Nel espíritu preindustrial d´Asturies el conceptu de propiedá nun sabía de la simplificación mercantil qu´anguaño esiste. El vínculu a la tierra y a tolo qu´hai de granible n´ella ye un lligamen que bien podíemos nomar transcendental. Tresciende, n´efeuto, a los depositarios o “llevadores” individuales a los que-yos toque, normalmente pola mor del mayorazu (primoxenitura). La casería y la casona son, dambes les dos, pequeños reinos onde´l monarca nun ye más que la cabeza dirixente temporal de dalgo que lu precedió y de dalgo que va a sobrevivir a él.





La casona ye la casería grande, dignificada, ampliada. Nun guarda rellación col castiellu. Háiles tovía que caltienen restos d´antigües defenses feudales, pero son ruines de castillu aprovechaes pa una esistencia campesina más pacetible Nun ye raro qu´en paralelo a la vieya torre medieval venga a amestase una torre ximielga de nueva fechura, dispuesta al otru llau d´un cuerpu central de vivienda. Pero´l noble o fidalgu rural yá nun ta en guerra coles xentes de la redolada, aínda menos teme a los moros, que viven llonxe o yá tan vencíos. La casona asturiana fue, nel Antiguu Réxime, un centro d´irradiación de Poder llocal y un centru de percepción de rentes y provilexos.





Dellos comentariestes (Valentín Andrés) fain contraste ente la Casona, pacetible, y el Castillu (belicosu). Asturies vien a ser el País de la Casona, mentes que Castiella recibe´l mesmu nome de so por ser el País de la Guerra, de la frontera, del sinu y enfotu imperialista. Pero hai que correxir nel intre estes falses apariencies d´antinomia. Asturies, nel so primer periodu formativu como estáu, hasta Alfonso II, hubo ser a la fuerza un País en resistencia. Depués de los ésitos militares del Rei Castu y del Rei Magnu, l´enclín imperialista, espansivu, abiertu a una pergrande meseta y a horizontes tendencialmente infinitos, fue tamién rasgu del Reinu de los Ástures. Lo que se siente decir, dacuando, del calter pacetible de los asturianos ye ún de tantos rasgos supuestamente nacionales colos qu´hai qu´andar con procuru. Dizse que somos pacetibles, cuando va sieglos yá que tamos anexionaos a Castiella, y les posibilidaes d´inicitiva política militar d´Asturies son nules, polo menos dende´l sieglu XIV. El puxu violentu de los nuesos antepasaos yera enorme nos sieglos VIII, IX y X. Arriendes d´ello, hai un factor que me paez bultable: el cambiu que da pasar d´una guerra defensiva, ente montañes (anicios del Reinu de los Ástures) a la guerra na meseta, en campu abiertu, a gran escala y con afoguín, esto ye la mal nomada “Reconquista”, en realidá guerra de Conquista, que foi en bona midida la guerra de los ástures (colos sos federaos galaicos, cántabros, etc.). Esi calter pacetible de nós, pueblu de montañeses, o aguerríu namás en plan defensivu, nun ye un rasgu ciertu. El puxu conquistador, cuasi yo diría depredador, fo bien grande a partir d´Alfonso II, y descaráu ya imperialista dafechu con Alfonso III. Y nun hai qu´escaecer que tres d´un gran Rei hai ún o dellos pueblos, que van a la guerra a la gueta de tierra, futuru, pan. El puxu conquistador de Castiella, d´otra banda, nun fue otro qu´una herencia del pùxu militar ástur.





Los pueblos vuélvense guerreros o adondaos según les más variaes circunstancies que-yos toque vivir. Spengler, n´otra obra titulada Años Decisivos, allugó n´Alemaña la clave de bóveda d´Europa. Con abondes dosis d´ideoloxía espansionista y nacionalista xermánica, Spengler nun podía dexar d´apuntar a un fechu bultable: Alemaña ye la constructora d´Europa, ye´l pidal d´esta civilización (nel sen spenglerianu de “cultura decadente”) qu´allugada xustamente nel Centru xeográficu del continente, tenía de tomar la misión d´aparar les “invasiones” orientales. Rusia yera vista pol filósofu xermanu como un país-continente de xeitu más bien asiáticu. El puxu del bolchevismu, de magar 1917, ye responsable d´esta visión rusófoba: lo ruso como avanzadilla d´un despotismu asiáticu espantible, los nuevos hunos, los nuevos tártaros.





Lo cierto ye que la Rusia moderna siempre tuvo un güeyu puestu na Xermania. Hasta´l marxismu que, teóricamente, emburrió´l so yá fracasáu bolchevismu, ye un productu directu de la escelente educación prusiana que tuvieron Karl Marx y Friedrich Engels. Lleer anguaño a Spengler recuerda abondo, más de la cuenta, el discursu actual sobre la “Guerra de Civilizaciones” (Hungtinton). El problema ye que l´adxudicación d´un país a un bloque civilizatoriu o a otru ye dacuando un exerciciu duldosu. ¡Cuántes veces ametieron –a la manera romántica- al Reinu d´España dientro del espaciu afro-árabe! Coses d´eses pasen siempre coles periferies.





Les periferies. Hai mester una teoría antropolóxica de la Periferia. Esti calter qu´un país pue tener de periferia ye, per se, relativu. Hai periferia con respeutu a un centru. Y entós, de forma alienada pa les periferies ye´l que fai orbitar a dellos países, pueblos o cultures alredor.





Ye enforma alienante qu´aun país se-y trate como periferia. España o Rusia con respeutu a Europa. Asturies (o Galicia o País Vascu) con respeutu a España. Facer esto ye inorar la propia estructura, calter, idiosincrasia del país en cuestión. Los propios habitantes, “nativos” d´esa periferia, interioricen el conceptu que los del centru-yos encasqueten. La propia identidá nun ta, entós, construyida dende dientro de la cultura, con llibertá y desendolcu propiu. Ye una mázcara distribuída y afechisca polos de fuera.





Esa mázcara alóxena ye la primer torga pa cualquier procesu de reconstrucción nacional, sobremanera cuando son munchos los años, o los sieglos, de dominación. Lo más propio, lo xenuino y esencial d´una cultura, tiende a vese como folclórico, trivial, aldeano, esprecetable. Por embargu, otros rasgos d´identidá munchos menos constitutivos del ser d´esi pueblu son puxaos artificialmente por turistes y comentaristes forasteros que nagüen polo pintoresco y anecdótico. Valga como exemplu l´atención de los europeos románticos prestada a tolo que de moro y xitano pudiera quedar en tierres andaluces del sieglu XIX, resclavos muncho menos importantes en comparación cola bayura d´influencies castellanes (inda asturlleoneses y gallegues) que hai n´Andalucía. Andalucía ye prollongación de Castiella (y d´Asturies-Lleón), pero eso a los buscadores d´exotismos nun-yos sirvía.





Otru tantu ha dicise d´Asturies: ye la periferia con referencia a un centru Castellán y una España oficialmente mesetaria y mediterránea. El so paisaxe nun se correspuende col arquetipu que n´España se tien de los español, y menos entá col arquetipu de lo que n´Europa se tien de lo hispánicu. Ye un paisaxe d´un verdor que manca, en comparanza col marrón mesetariu y llevantinu. Un verdor que dura tol añu, constante, como constante ye´l riegu que-y fai la lluvia, y sobremanera, l´orbayu, esa especie de “lluvia nacional” d´Asturies.





Un país, l´asturianu que se define pol puxu o sobrovivencia –hasta´l pasáu sieglu- de la so específica granxa de castra europea: la casería. Tolo que d´occidental s´impunxo na Península Ibérica al sur de la cordalera cantábrica, y tovía más, al sur del Duero, vieno de la mano, amás del derechu, la ñobleza y la relixón, d´esa humilde institución. Fue l´adaptación de la Casería a otres llatitúes non cantábriques, dica´l sur,





**** ****





Pseudomorfosis históriques nomo yo a aquellos casos nos qu´una vieya cultura estraña xace sobre un país entá con tanta brenga, que la cultura xóven, autóctona, nun algama respirar llibre, y nun solo nun llogra constituyise formes espresives pures y peculiares sinón nin siquieramente aportar al plenu desendoluc de so conciencia propia. Tol cazumbre que xube de les profundidaes del alma primixenia va vertese nes cavidaes de la vida ayena. Sentimientos mozos cuayen n´obres caduques, y en cuenta d´erguese con propia enerxía morfoxenética, medra l´odiu al llonxanu poder en proporciones xigantesques”. (LDO, II, 294).





Oswald Spengler toma´l conceptu de pseudomorfosis de la mineraloxía. A partir de procesos anteriores queden cavidaes o moldes baleros, qu´un día ocuparon otros materiales. Depués, los nuevos conteníos nun tienen otro que dir ocupando´l llugar que se-yos abre per aciu d´esos procesos previos, y namás qu´esi llugar. Ye un exemplu de cómo la Forma pesa sobre´l Conteníu, y nun fai otro que primir, estrenchar les sos posibilidaes d´espresión.





El casu paradigmáticu, magar que nun tien por qué ser l´únicu, ye´l del pesu descománau que l´Antigüedá Clásica exerció sobre los anicios de la “Cultura Máxica” (arábiga) y sobre la “Cultura Faústica” (occidental). Ye bultable la orixinalidá del nustru filósofu: nun hai una especie d´historia continuada del Cristianismu. Ésta relixón nun fue una unidá. Hai qu´estremar el cristianismu de la primer dómina (sieglos I-X), calterizáu como “máxicu”, y el d´una segunda dómina, diferente ensembre, que se noma “fáusticu”. Cuasi comparten el nome, namás, y pocu más, quiciás una mitoloxía.





El cristianismu “máxicu” fue, al entamu, una secta más dientru del ensame bayurosu de sectes cuando la cultura clásica, apolínea, vieno abaxo ensin que l´imperiu que la caltenía se viniera ainda abaxu. Según Spengler, munchu tiempu enantes que l´Islam esistiera, una muchedume de pueblos orientales, encoyidos baxo formes culturales ayenes, helenístico-romanes, yá vivíen baxo una cultura “máxica” que l´Islam vieno a lliberar, como que quita una espicha a una pipa y dexa que tola enerxía contenía esquite haza fuera con brenga terrible.





Les mases apitiguñaes nes grandes ciudaes helenístico-romanes yá nun cuntaben como “patria” eses vieyes ciudaes-estaos del Mediterrániu, y muncho menos depositaben so corazón y sos esperances na que fuera más poderosa y señora postrera d´elles, Roma. ¿Qué “patria” o “nación” esistiría pa esi proletariáu urbanu tardo-antiguu? Denguna patria “política”, como l'Atenas o la Roma del clasicismu. O bien el fríu “cosmopolitismu” qu´enseñaben los intelectuales, o bien una nueva patria afechisca pal pueblu baxu, la patria espiritual. Ñaz la “Ilesia” como patria espiritual que nun tien tierra, nun tien fronteres, nun tien raigón, nun tien raza. Basta un ritu máxicu (bautismu o ritu de pasu cualquiera) pa cruciar la invisible raya que separta l´anterior “confesión” a la nueva “nación”: pa pasar a ser una Comunidá Mística.





Les iglesies tardo-antigües nada nun saben de patries y paisaxes, de races y de raigones echaos al tarrén, al fondu suelu de la tierra prieto. Son comunidaes d´almes y, poro, son per se transmigratories. El so apostoláu y proselitismu la fai dir d´un a otru lláu. Son almes viaxeres que nun son d´esti mundu. La patria de so ta al otru llau de la muerte.





Nesto coincidente sobre manera col cosmopolitismu de los estoicos, epicúreos, escépticos y demás racionalistes y agnósticos que-yos son contemporáneos. Paez qu´hai un pínfanu ente dambos mundos, pero dambos los dos son productu de les altes civilizaciones urbanes y, poro, decadentes. Productu d´una especie d´home cansu y pacetible, que busca tranquilidá mental (ataraxia) o la muerte. Yá nun se trata de xente cenciello, que busca conquistar la tierra y nueves tierres, sinón que yá tien perdío abenayá tou contauto cola tierra, y pisa los empedraos urbanos, percorre foros y mercaos, y golismia de contino´l sudu del convecín.





El pacifista cultu del helenismu serondiegu, igual que´l proletariáu máxicu de primer hora (gnósticu, cristianu primitivu, neoplatónicu, etc.) son fíos de la gran ciudá antigua, enllena de parásitos, de proletariáu manteníu artificialmente pol Estáu, de residuos de pueblos y naciones yá vencíos y dilíos nel Imperiu. Ellí viven tamién los fellahs, nome col que se conocen los campesinos exipcios que viven baxo l´Imperiu Romanu, y prototipu de pueblu que Spengler considera inerte, ayenu a toa dirección propia, masa sobre la qu´esnidien foles socesives de nuevos señores.





La nación faústica, igual que´l cristianismu faústicu consiste en una triba d´alma distinta dafechamente. La nación faústica, ye dicir, la Occidental, la Europea, ñaz según Spengler al rodiu del sieglu X, más o menos. Elli la concibe arrincando del Imperiu Carolinxu: yera esti una agrupación de naciones d´aniciu xermánicu de les que diba a surdir la Europa d´anguañu. L´Asturorum Regnum fue un estáu independiente énte los carolinxos, y ente dambos los dos estaos hubo rellaciones diplomátiques, ha recordase.





Anchor d´horizontes, disparu de les mires dica´l futuru: esti ye l´espíritu qu´anima una nación faústica. Astures yéralo baxo tolos criterios indicaos por Spengler. Depúes d´una resistencia testonera tres la cordalera cantábrica, nun hai más que emburriar p´alantre, salir al llanu a la gueta de futuru, de tierres, d´horizontes siempre postergables. Esi enclín guerreru vieno a pasar de lo defensivo a lo conquistador. Asturies cuando pasa a ser reinu y nación faústica, más o menos en tiempos de Carlomagno, ye nación conquistadora, depredadora. Nel so enfotu de conquista dexa atrás el solar patriu y al entrar na meseta redescubre los vieyos campos cerealistes colos qu´una vez, enantes del contautu con Roma, esfrutó. Los ástures antiguos yeren una unidá humana al norte y al sur de la cordalera. La unidá étnica yera tamién unidá ecolóxica y productiva: la unidá que s´afita na más estricta complementariedá. Ástures transmontanos y cismontanos teníen pa si la homedancia y ganadería del más templáu clima oceánicu, atlánticu, tantu como la inmensa llanura lleonesa (y en parte zamorana y palentina) rica pal cereal. Roma france esa unidá natural pola mor de la conquista imperial. En colando esi imperialismu, los antiguos “indíxenes”, ye decir, ástures, vuelven a llevantar la cabeza col fin de sascudise d´otru xugu: el islámicu, esa nueva Roma sureña, esi nuevu imperiu estranxeru. Indíxenes mandaos por Pelayu y los de so sangre xunto a los aportaos pola casa de Pedru de Cantabria. Un alma indoxermánica que baxa al llanu como fieres xabaces, de manera nun mui distinta a la qu´amosaron los vikingos al embarcase en barcos p´hacia´l sur, los francos de Carlomgano pa espardir un Imperiu, o los de tou pueblu con vocación d´Imperiu y conquista. Un datu qu´hai que pescanciar ye qu´Asturies pierde´l so nome más allá de los cordales, xusto en cuantes ta afitada esa vocación d´Imperiu y conquista. Xusto cuando llega al sur de Lleón, y hai treslláu de la Corte a la ciudá que da nome al país de Lleón, antigua tierra de los ástures cismontanos, güei parte del País ástur.





**** **** ****








Los países faústicos de la Edá Media viven nuna tensión ente dos clases superiores que guarden una fisonomía dafechamente diferentes, un odiu y una complementariedá bultables: la nobleza y el sacerdociu.




El sacerdociu faústicu de la Edá Media cristiana yá nun tien un res que ver col de la dómina “máxica”. Ye un cristianismu diferente ensembre. Uviéu, Asturies, entren dientro la órbita de los francos. El Beatu de la Lliébana, un personaxe ástur, ta al cabu de les disputes ideolóxiques y acolumbra un futuru d´unión colos francos. Francos (nel sen xenéricu d´entós, ye dicir, xentes ultrapirenaiques) vendrán a Asturies y la van a coneutar col restu d´Occidente. El camín de Santiago ye´l gran inventu de los Reis Ástures pa estrenchar llazos fuertes cola Xermania, el “Franquistán”, como podríen dicir los muslimes de Toledo, Cordoba, Damascu o Bagdad. El Beatu tuvo la gran visión de curtiar les pontes pa col Arzobiespu toledanu, y dexar a los cristianos “collaboracionistes” col Islam na soledá de la cueva máxica d´esa relixón oriental y afromediterránia.





Vectores infinitos del alma fáustica énte l´universu de la Cueva Máxica. Spengler diz que la relixón islámica, másimu esponente de la mentalidá “máxica” ye´l puxu- verdaderamente- del puritanismu dientro del universu cueviforme (espresión tomada de Leo Frobenius). Unos cristianos cuasi recién convertíos, de castra celtoxermánica, nun podíen encaxar dientro d´esi universu cueviforme. Un universu pobláu por milenta fellahs, esto ye, campesinos ensin patria nin ñobleza propia, ensin lligamen pa cola Tierra, y plebe urbana, masa, que siempre viven a la espetativa de camudar d´amu (l´ultimu amu, l´árabe) ensin querer garrar les riendes de los sos propios destinos. Al norte nun hai ciudades, nun hai residuos de cultura helenístico-romana nin semítica. Hai pueblos prístinos de pastores que busquen tierra, busquen pastu, y hai tamién bandes de señores que nunca escaecieron lo que yera vivir en peligru, a caballu y con xelmu, enfataos en robar tierres a otros.





Les esplicaciones reduccionistes nunca son a talantar la Historia. Nunca nun debemos confundir un enfoque materialista d´esta ciencia con un reduccionismu económicu. Hebo quien desplicó l´orixe de la nomada “Reconquista” por una competencia ente ástures y bereberes polos pastos. Esti analísis pue ser válido pa momentos puntuales, pa detectar la casua próxima, ye dicir, la espoleta qu´afala secuencies de fechos que deriven directamente del alma de pueblos en llucha. Ente l´avanzáu Sur (Al-andalus) urbanu, cuasi capitalista, esclavista, y el retrasáu Norte (rural, pastoril, “bárbaru”) nun esiste metru comparativu dende un puntu de vista económicu. Únicamente hai que pescudar cuestiones cincantes a la “tierra de nadie” y al fracasu beréber de colonizar la zona mesetaria, fracasu árabe más bien, pa asina interponer unos bárbaros beréberes ente medies d´otros bárbaros, los del norte (ástures, galaicos, cántabros).





Güei Asturies podía ser un colonatu beréber, ye decir, una “marca” del Islam, o una especie de reserva indíxena d´una Alta Civilización sumamente decadente dende´l sieglu X. Pero non, l´alma incompatible de pueblos en llucha ye la que fai que s´establezan fronteres, y ye l´espíritu belicosu de los pueblos el que fai qu´eses fronteres vayan esmuzándose pelos cuatro puntos cardinales.





Anguaño Europa podía ser “mora” de nun ser poles victories “espolleta” de Pelayu y de Carlos Martel. El conceptu d´Europa naz únicamente a partir d´eses xóvenes naciones que buscaben lo que Spengler noma el so sinu. El sinu ye nel filósofu alemán l´equivalente alternativu a la causalidá de los materialistes y cientifistes. El sinu que, tres unes cuantes victories guerreres afítase col llabor “cultural” d´un sacerdociu de nuevu alcuñu. Volvemos equí a la tensión y complementaridá ente nobleza y sacerdociu. Lo que ficieron los monarques asturianos, lo que fizo el gran y terrible Rei Ramiro, fue dir a la guerra y llevantar Ilesies. Asina se vien a definir el reináu d´estos homes arrechos.





Dir a la guerra. La nobleza surde de la propia Tierra. Una clas noble “cosmopolita”, desenraigonada del terruñu, como pasa güei coles Cases Reales y los descendientes d´aristócrates nel esiliu, ye una nobleza decadente. El llinax, la llínea perantigua d´ancestros ye l´aspectu temporal d´esa voluntá de perduración. L´otru aspectu ye l´espaciu: enseñorease d´un espaciu. El noble que pierde, de grau o a la fuerza, sos finques, feudos, solares y terruños rebáxase a la categoría de patriciu urbanu, de burgués distinguíu, rabáxase a una categoría meramente estética si ye que yá vive desposeíu de poder o influencia política. Pero la nobleza alto-medieval ye planta que manda sos raigones a estratos bien fondos del país qu´ella mesma echa a andar. Nos inicios malapenes hai estremancies ente´l noble y l´aldeanu. Un grau mayor de valentía na guerra, esi debió ser l´aniciu de toa distinción nuna dómina na que nun hai conceptu de propiedá sobre la tierra (propiedá “privada” que nun hai nel sen capitalista hasta la modernidá). Económicamente, estos nobles de los entamos son indistinguibles, bien de veces, de los aldeanos, del pueblu. La rellación que se-y quixo dar a Pelayu, por exemplu, cola nobleza goda, ye asuntu tan mitolóxicu como la mayor parte de les xenealoxíes conocíes na Historia, tan mítico como facer descender los césares romanos del troyanu Eneas. Más bien cabe imaxinar a un Pelayu como cabezaleru indíxena, colos vezos matrilineales qu´eso diba implicar nos casorios rexios posteriores, antítesis de los vezos godos que traín a la Monarquía Ástur los descendientes de Pedro, dux de Cantabria y el godu Alfonsu.





¿Y como vivíen estes cabeces floríes del mesmu pueblu? Sicasí ún pue pensar nesos reis (en rigor régulos) de la Iliada: ellí vense a los reis micénicos, en tiempos de paz, llabrar sos propios campos o construir barcos coles sos propies manes. Qu´un rei dexe´l llabiegu y conoza´l sudu del trabayu de campu tantu como los sos esclavos da cuenta de lo que debieron ser les alboraes de toa cultura. Solamente cuando suenen los glayíos de la guerra, el rei distínguese del esclavu o del vasallu por garrar la espada, teniendo que soltar entós el llabiegu y demás aperios. Pero cuando garra esa espada, el xelmu, la coraza, malapenes ye a estremase del pueblu llibre, el pueblu que tamién tien derechu a dir a la guerra y que de forma natural aconcéyase n´asamblees. Les Cróniques del Reinu Astur falen d´eses asamblees, y d´elles va salir aclamíau Pelayu como princeps, escurque como cabezaleru guerreru (tovía non rei nel se góticu, sinón régulu nel sen asambleariu ástur). El llector pue pensar guapamente nes asamblees xermániques de pueblos guerreros n´armes pa pescudar esti procesu.





Solamente cuando tan afitaes unes fronteres y una capacidá defensiva de rempuesta pueden estos reis pensar en palacios (al entamu el palaciu de los reis ástures debio ser como una casería un pocu grande, y los cortesanos, unos criaos que viven baxo un mesmu techu, como los palacios vikingos), pensar n´Ilesies y n´otros llabores simbólicos. Ye entós cuando´l régulu guerreru nun solo afita un espaciu vital, per aciu la conquista y la espansión repobladora. Yá ye un rei que quier perdurar na memoria, y pa eso sofita la Ilesia, el sacerdociu, la casta-antiguerrera, tan necesaria por embargu pa la sobrevivencia anímica de la realeza y los nobles que van a la guerra col monarca. El templu, inda´l supuestu humile templu del arte asturianu, ye arguyu de guerreru alzáu al cielu. La cruz ye una espada vuelta abaxo, y el símbolu de la cruz ye, na dómina ramirense, por exemplu, la verdadera simbólica que sirve pa llantar batalla al sarracenu. Esa cruz ha mester un templu, otra simbólica que pon en contautu´l Reinu col Occidente, ye dicir, col país de los francos y xermanos. Ye tremendu´l xeitu nórdicu qu´amuesen les nueses ilesies d´Arte Asturianu. Tracamúndiase col estilu anterior, el visigodu y alviértense otros influxos, como nun podíen ser menos: romanos, bizantinos. Pero estes ilesies rurales, cencielles y al empar arguyoses, son d´una verticalidá y d´un calter políticu imperial que paez imposible de negar. Dan al país d´Asturies la midida de lo que fue: un Reinu echáu p´alantre, a la gueta de la inmensidá. Nun paez enquivocao comparar cómu l´ástur, l´home norteñu, va buscar la aventura frecuentemente lloñe de la Patria, dexando atrás el solar d´aniciu. Sieglos más tarde enllenamos de fíos América, dientro d´un procesu d´occidentalización del Nuevu Continente. El sureñu, l´español, pela cueta, mira de regüeyu l´África del Norte y dulda siempre si nun tará pa ellí la so espansión natural.





Nun sabemos lo que se tresmite de xeneración en xeneración y que da perdurabilidá a dellos rasgos del alma d´un pueblu, d´una nación. Siempre s´usó´l mitu del sangre: “facer lo que nos pide´l sangre”. Los xenes, la raza… toa esa pseudobioloxía siempre tuvo mui presente a la hora d´afitar rasgos esenciales nel alma de los pueblos. Hai que decir equí que nel casu de Spengler, y en contra de la “mala prensa” que se derramó sobre él, el filósofu de La Decadencia d´Occidente nunca nun fue un nazi y nun compartió les tesis tosques y asesines de triba bioloxicista d´Adolf Hitler y los sos siguidores. La “raza” pa Spengler ye una entidá espiritual. Cuando escribe sobre “races”, dalgo habitual entá na so época, da por afitao qu´éstes son mestures de milenta pueblos. Raza celta, raza xermana, raza íbera, raza llatina… Estos pueblos son siempre heteroxéneos nos sos rasgos físicos, productu de mestizaxes. Ye la convivencia y fusión cultural lo qu´acaba dando llugar a les “races” como les mentaes. Inda Spengler deriva d´esi tonu y esperiencia anímiques un ciertu resultáu morfofísicu. Esa ye, precisamente, la idea d´una fisiognómica.





La fisiognómica más qu´una ciencia ye un tactu. De tolos sintíos, ye´l del tactu´l sintíu primixeniu. La vista, l´oyíu y los demás medios de recepción de lo esterno deriven realmente del tactu. La vida vexetal fáise animal tantiguando, a palpu, les circunstancies del mundu en tornu (Umwelt). La Historia, más qu´una ciencia ye un “conocimientu d´homes”. Un conocimientu nel qu´ha dase un olfatu, una esperiencia depurada que permite intuitivamente saber per aú vienen, aú van, y qué contestura tienen los seres humanos a lo llargo del so sinu. De la mesma manera qu´hai una güeyada intuitiva ya inmediata anque val pa conocer a una persona individual, y esa impresión capta lo esencial d´ella, tamién hai esa mesma güeyada sobre una cultura, un pueblu, una civilización.





La fisiognómica nun se dexa engañar pola dominante económica del momentu. Detrás de la Economía, del Mou de Producción, que diría Marx, hai unes estructures secretes que se s´escuenden baxo les lleis inexorables y puramente materiales.





Anguaño, baxo´l férreu capitalismu nel que vivimos hai una clas esplotadora, otra esplotada. Pero tamién hai un territorio que se beneficia a costa d´otru, una cultura que secularmente s´impón sobre otra, un pueblu colonizáu por otru y que muerre pa que vivan otros.





No hay comentarios:

Publicar un comentario en la entrada